احلى عيد ميلاد لاحلى بنتين

السلام عليكم يا احلى بنات وستات فى الدنيا

انا بحبكم فى الله وبتمنى اشوفكم بعنيه واسلم عليكو واحده واحده من اول سيمونه للشيف لطيفه والواثقه بالله وكل الفتوكات اللى بيفيدونا بتجاربهم وحتى اللى بيدخلو يسالو زى حالاتى ههههههههه لاننا بردو بنستفيد من طرح مواضيعهم

طبعا رغايه من يومى ههههههههههه
اللهم صل على سيدنا محمد وعلى آله وصحبه اجمعين
ندخل بقه فى الموضوع بس برده تانى احب اشكر سيمونه جدا جدا ودعينا ليها انا وماما واخواتى لانها ساعدتنى جدا جدا

خلاص محدش يتعصب قلا يجيلكو الضغط

عملت احلى عيد ميلاد لاحلى بنات والصور كتير كتير
بالترتيب كده عيد الميلاد كان الجمعه فجبت طلباتى كلها اول الاسبوع تمام وكله هاند ميد ههههههههههههه اى بالمنزل
ومشترتش اى حاجه جاهزه

يوم الاربعاء بالليل عملت كيلو الكنافه ونصف جلاش

ودى صورتهم بعد السوى والتقطيع

نيجى للطريقه طبعا عارفين الكنافه بتتعمل ازاى تتففت وتتقطع لما تقر وتعترف بكل حاجه ههههههه
والنصف كيلو عليه كوبايه سمن وكوب سكر ويتقلبو على بعض وتمام التمام ونفرد نصها فى الصينيه المدهونه سمنه ونحط الحشو بتاعنا زى ما احنا عاوزين وبعدين نرص النص التانى ونساويها بطبق مسطح ونتك عليها
عشان تبقى سوى واحد (انا عملت الكيلو فى صينيه كبيره جدا على قد مقاس الفرن )وقومت حطه الصينيه فى كيس كبير وفى الثلاجه
وبرده عملت الجلاش فى الصاجه بتاعت الفرن بجد يا جماعه سهله وموفره فى الوقت والجهد
جبت ورقه الجلاش وتانيتها 2 وحطيت الحشو ومعلقه سمنه ولفيتها زى صباع البقسماط طويل كده
ونقلته فى الصاج لاخر الكميه ورشيت او دهنت الوش برده سمنه خفيف مش كتير وفى كيس وعلى الثلاجه عدل والله محصلها اى حاجه خالص
وسويتهم تانى (الخميس بالليل) يوم وشرباتهم انتو عارفينه طبعا
تمام كده لحد هنا عادى

نيجى على التورته عملت حته تورته يا بنات انما ايه فاشلللللللللللللللللللللللللللللللللللله لحد بكره
جيت عليكو جرى لقيت مين؟ سيمونه الله يسعدها ويباركلها ويرزق من تحب بما يريد ويتمنى يارب طولت صح؟
معلش قريت ليها موضوع وقمت نفذت بالحرف والكلمه ودى كانت النتيجه

طبعا كلكو عارفين الكيكه الاسفنجيه واساتذه ما شاء الله ربنا يزيدكو
بس هقول برده الطريقه والا اقولكو اجيب الرابط كفايه رغى ههههههههههههه
http://food.fatakat.com/recipe7401.html

تمام كده عملت واحده من الكيكه الاسفنجيه والتانيه عملتها بطريقتها 1234(سيمونه )

وهى 1 كوب زيت وسمنه و1 كوب لبن
2كوب سكر و3 كوب دقيق و4 بيض

والطريقه هنا برده
http://forums.fatakat.com/thread3776818
بالتفصيل علشان الحبايب لامؤاخذه بقى يا سيمونه ههههههههههههه

ودى كانت النتيجه بعد التزويق وجناش الشيكولاته وهنزلكو الطريقه برده مع الصوص الخاص بيا

الجناش عملته بالطريقه دى كريمه لبانى (عملتها فى البيت جبت نصف كوب لبن مع نصف كوب قشطه وفى الخلاط ضربتهم)وحطيتهم فى كسروله لحد قبل الغليان ونزلت علبه شيكولاته 255 جرام متكسره وقلبه لحد ما دابو خالص وزودت معلقتين كاكاو وبس كده
اما الصو صالشيكولاته فبعمله كده
نص كوب زيت عليه نص كوب سكر و5 معالق كاكاو واضربهم فى الخلاط
وحطيت الصوص الاول وبعدين الجناش على الوش وبعدين الفراوله

وكان عيد ميلاد جميل
لسه فى بيتزا وباتيه وجلاش حادق وشيبس وهكمل معاكو لو لقيت فى تشجيع اصلى اول مره اكتب فى القسم ده
هستنى ردودكم لو حابين اكمل اصلى تعبت بصراحه من كتر الرغى ههههههههههههههه
سلام مؤقت(يارب الصور تظهر والا هلاقى الفتوكات بيجرو ورايا بالشبشب )

دى صوره البيتزا ودى بقه صوره الباتيه

الكميه دى كلها معموله ب7 ونصف كوبيات دقيق
الطريقه بتاعت ال10 دقايق
جبت طبق كبير وحطيت خميره عضويه و سكر ودعكتهم عادى جدا وضيفت الميه الدافيه وبعدين ال3 كوبيات دقيق
وسبتهم 10 دقايق ورجعت تانى زودت باقى القيق ولفيتهم مع بعض وفى الاخر نص كوب زيت وسبتها تخمر عادى برده
وبعدين قسمتها نصين عملت الباتيه بنص العجينه طلعت 30 واحده
وعملت الصاج بتاع الفرن ده بيتزا برده عملت 30 قطعه جميله قوى
معلش يا بنات معنديش خبره قوى فى تنزيل الصور حاجه تعل بصراحه هههههههههههههه

نيجى بقه للجلاش الحادق وده صورته

نفس طريقه الحلو الورقه متنيه على اتنين وعملت حشوتين
واحده جبنه قريش اه والله قريش بس تحفه وكل اخواتى انبهرو بيها
هههههههههههههه
جبت قطعتين جبنه قريش عليهم فلفل اخضر مقطع صغير وزعتر اه واه من الزعتر ههههههههههههههه تحفه
وحشيت الصوابع زى الحلو كده بس قطعته على اربع وبعجينه الدقيق او حته ميه والله كانت بتقفل معايا وفى زيت غزير وسخن
ويتقلى عادى دقيقه وشكرا
الحشوة التانيه لحمه مفرومه برده بنفس الطريقه وهى برده من وصفات سيمونه الله يباركلها ويسعدها يارب
بس الصوره مغمقاه جدا فى الحقيقه المعظم ساب الحلويات وقعد يقرقش فيه من طعامته وكان سخن وجميل الحمد لله